Sonte në orën 20:00 në Riga të Letonisë do të zhvillohet finalja e Eurobasket 2025, ku Gjermania dhe Turqia do të përballen për trofuen e madh.

Të dyja skuadrat kanë arritur deri në këtë fazë pa asnjë humbje, duke e bërë këtë finale edhe më të veçantë.

Një precedent i tillë është parë për herë të fundit në vitin 2003, kur në finale u përballën Lituania dhe Spanja.

Turqia kërkon të shkruajë historinë duke fituar për herë të parë titullin e kampiones së Evropës. Kjo është vetëm finalja e dytë për përfaqësuesen turke, pas asaj të vitit 2001 kundër ish-Jugosllavisë. Në rast triumfi, Turqia do të bëhej kombëtarja e 16-të që ngre trofeun.

Nga ana tjetër, Gjermania synon trofeun e dytë në historinë e saj. Kampionët e vitit 1993 kërkojnë ta përsërisin suksesin, ndërsa finalen e dytë të tyre, atë të vitit 2005, e kishin humbur përballë Greqisë./RTK